سورۃ الزخرف 43:57

57- جب مشرکوں نے یہ خیال کیا کہ عیسیٰ علیہ السلام جن کی عبادت عیسائی کرتے ہیں، وہ بھی درج ذیل ارشاد باری کے عموم میں داخل ہیں: ﴿اِنَّکُمْ وَمَا تَعْبُدُوْنَ مِنْ دُوْنِ اللّٰہِ حَصَبُ جَہَنَّمَ اَنْتُمْ لَھَا وَارِدُوْنَ﴾ ’’بے شک تم اور جن کو تم اللہ کے سوا پوجتے ہو، دوزخ کا ایندھن ہیں۔ تم اس میں داخل ہونے والے ہو۔‘‘ (الأنبیآء 98:21) کیونکہ جس طرح اللہ تعالیٰ نے بتوں کی عبادت سے منع کیا ہے، اسی طرح عیسیٰ علیہ السلام کی عبادت سے بھی روکا ہے تو اے رسول ( صلى اللہ عليہ وسلم )! تب آپ کی قوم کے لوگ جھگڑا کر کے چیختے چلاتے اور شور شرابا کرتے ہوئے کہتے ہیں: ہم اس بات پر خوش ہیں کہ ہمارے معبودوں کا بھی وہی مقام ہے جو عیسیٰ علیہ السلام کا ہے، تو اللہ تعالیٰ نے ان کا رد کرتے ہوئے یہ آیت نازل فرمائی: ﴿اِنَّ الَّذِیْنَ سَبَقَتْ لَھُمْ مِّنَّا الْحُسْنٰی اُولٰٓئِکَ عَنْھَا مُبْعَدُوْنَ﴾ ’’بے شک جن لوگوں کے لیے ہماری طرف سے پہلے ہی بھلائی لکھی جاچکی، وہ دوزخ سے دُور رکھے جائیں گے۔‘‘ (الأنبیآء 101:21)