سورۃ النساء 4:176

176- اے رسول( صلى اللہ عليہ وسلم )! یہ آپ سے پوچھتے ہیں کہ انھیں کلالہ کی میراث کے بارے میں فتویٰ دیں۔ کلالہ سے مراد مرنے والا ایسا مرد یا عورت ہے جس کا باپ ہو نہ اولاد۔ ان سے کہیں کہ اللہ اس کی وضاحت میں یہ حکم دیتا ہے: اگر کوئی شخص فوت ہو جائے اور اس کا باپ اور اولاد نہ ہو اور اس کی ایک حقیقی یا علّاتی (باپ کی طرف سے) بہن ہو تو اسے اس کا مقررہ حصہ کل مال کا آدھا (°) ملے گا۔ اگر فوت ہونے والے کا وارث صرف اس کا حقیقی یا علّاتی بھائی ہے اور اس کے ساتھ کوئی صاحبِ فرض (مقرر حصے والا) نہیں ہے تو سارا ترکہ بطور عصبہ بھائی کو ملے گا۔ اگر کوئی صاحبِ فرض موجود ہے تو اس کا مقررہ حصہ دینے کے بعد باقی ماندہ بھائی کا ہوگا۔ اگر کسی مرنے والے آدمی کی صرف دو یا دو سے زیادہ حقیقی یا علّاتی بہنیں ہیں تو انھیں دو تہائی (µ) حصہ ملے گا اور یہ بطور فرض ہوگا۔ اگر مرنے والے کے حقیقی یا علّاتی بھائی بہن دونوں ہوں تو وہ بطور عَصَبہ پوری جائداد کے وارث ہوں گے اور آپس میں معروف قاعدے ’’مرد کا حصہ دو عورتوں کے برابر ہے‘‘ کے مطابق تقسیم کریں گے اور مرد کا حصہ عورت کے حصے سے دوگنا ہوگا۔ اللہ تعالیٰ نے تمھارے لیے کلالہ وغیرہ کے احکام اس لیے وضاحت سے بیان کر دیے ہیں تاکہ تم ان کے معاملے میں ٹھوکر نہ کھاؤ۔ اللہ تعالیٰ ہر چیز کو خوب جاننے والا ہے اور اس سے کوئی چیز مخفی اور پوشیدہ نہیں ہے۔