Surja El-En'am 6:152 الأنعام

Ai jua ka ndaluar që t’i afroheni pasurisë së jetimit (i cili ka humbur babain dhe nuk e ka arritur moshën e pjekurisë), përveçse kur është në dobi të tij, apo i shërben për shtimin e pasurisë së tij, derisa të arrijë moshën e pjekurisë e të fuqizohet. Ai e ka bërë haram edhe vjedhjen në matje dhe peshore, madje është e detyrueshme për ju ruajtja e drejtësisë në marrëdhëniet tregtare. Ne nuk detyrojmë asnjë përtej mundësive të veta, kështu që drejtësia precize që nuk mund të arrihet në këto marrëdhënie (në matje, në peshë etj.) nuk do të merret në përgjegjësi. Ai jua ka ndaluar rreptësisht edhe mosthënien e së Vërtetës, në informacione apo dëshmi, duke mbrojtur ndonjë të afërt të dashur apo shok (e të gënjeni të tjerët). Ai jua ka bërë haram edhe shkeljen e besës, nëse ia keni dhënë Allahut apo e keni dhënë në emër të Tij; përkundrazi, ju e keni përgjegjësi që të jeni besnik i saj. Këto që u përmendën janë disa urdhra të prerë të Allahut, me shpresë se do të kujtoni përfundimin e çështjes suaj.