سورۃ الاحزاب 33:53 الأحزاب

53- اے اللہ تعالیٰ پر ایمان لانے اور اس کی شریعت پر عمل کرنے والو! تم نبی صلى اللہ عليہ وسلم کے گھروں میں داخل نہ ہوا کرو مگر جب تمھیں کھانے کے لیے بلایا جائے اور داخل ہونے کی اجازت دی جائے تو داخل ہو سکتے ہو۔ کھانا پکنے کے انتظار میں زیادہ دیر نہ بیٹھو بلکہ جب کھانا تیار ہو جائے اور تمھیں کھانے کے لیے بلایا جائے تو داخل ہو اور جب کھانا کھا لو تو فوراً چلے جاؤ اور اس کے بعد وہیں بیٹھے ایک دوسرے سے باتوں میں نہ لگے رہو۔ بلاشبہ تمھارا یہ بیٹھے رہنا نبی صلى اللہ عليہ وسلم کے لیے تکلیف دہ ہے مگر وہ تمھیں یہ کہنے سے شرماتے ہیں کہ چلے جاؤ جبکہ اللہ تعالیٰ حق کا حکم دینے سے نہیں شرماتا، اس لیے اس نے تمھیں چلے جانے کا حکم دیا تاکہ تم وہاں رک کر نبی صلى اللہ عليہ وسلم کو تکلیف نہ دو۔ جب تم نبی صلى اللہ عليہ وسلم کی بیویوں سے ضرورت کی کوئی چیز مانگو، جیسے برتن وغیرہ تو پردے کے پیچھے سے مانگو اور ان کے سامنے آ کر ان سے نہ مانگو تاکہ تمھاری آنکھیں انھیں دیکھ نہ پائیں۔ یہ ان کی حفاظت کی خاطر اور رسول اللہ صلى اللہ عليہ وسلم کے مقام و مرتبہ کا لحاظ رکھنے کے لیے ہے۔ پردے کے پیچھے سے مانگنا تمھارے اور ان کے دلوں کے لیے مکمل پاکیزگی کا باعث ہے تاکہ شیطان کو وسوسے اور برائی کو خوشنما بنا کر دکھانے کے ذریعے سے تمھارے یا ان کے دلوں تک راہ پانے کا موقع نہ ملے۔ اے مومنو! تمھارے لیے جائز نہیں کہ تم زیادہ دیر باتوں کے لیے ٹھہر کر اللہ کے رسول صلى اللہ عليہ وسلم کو تکلیف دو اور نہ تمھارے لیے آپ کی وفات کے بعد آپ کی بیویوں سے نکاح کرنا جائز ہے کیونکہ وہ مومنوں کی مائیں ہیں اور کسی کے لیے اپنی ماں سے شادی کرنا جائز نہیں۔ بلاشبہ تمھارا یہ تکلیف دینا اور اس کی ایک صورت آپ کی وفات کے بعد آپ کی بیویوں سے نکاح کرنا ہے، حرام ہے اور اللہ تعالیٰ کے نزدیک یہ بہت بڑا گناہ شمار ہوگا۔