سورۃ الحج 22:5

5- اے لوگو! اگر تمھیں ہماری قدرت و طاقت کے بارے میں شک ہو کہ ہم تمھیں موت کے بعد کیسے زندہ کریں گے تو تم اپنی پیدائش پر غور کر لو کہ یقیناً ہم نے تمھارے باپ آدم علیہ السلام کو مٹی سے پیدا کیا، پھر ہم نے اس کی اولاد کو منی کے اس قطرے سے پیدا کیا جو مرد عورت کے رحم میں ٹپکاتا ہے، پھر وہ منی جمے ہوئے خون کی شکل اختیار کر لیتی ہے، پھر وہ جما ہوا خون گوشت کے ایسے لوتھڑے کی شکل میں بدل جاتا ہے جو چبائے ہوئے گوشت کے ٹکڑے کے مشابہ ہو، پھر گوشت کا وہ لوتھڑا یا تو کامل انسان کی شکل اختیار کر لیتا ہے جو رحم میں باقی رہتا ہے اور نومولود کی صورت میں زندہ باہر نکلتا ہے یا پھروہ پوری شکل اختیار نہیں کرتا اور رحم اسے گرا دیتا ہے تاکہ ہم تم پر واضح کر دیں کہ ہم تمھیں مختلف مرحلوں سے گزار کر پیدا کرنے پر قادر ہیں۔ ہم جس جنین کو چاہتے ہیں، رحم میں ٹھہراتے ہیں حتی کہ مقرر مدت میں جنین کی پیدائش ہوتی ہے اور وہ مدت نو ماہ ہے۔ پھر ہم تمھیں تمھاری ماؤں کے پیٹوں سے بچے کی صورت میں نکالتے ہیں، تاکہ تم قوت و عقل کے کمال کو پہنچو۔ تم میں سے کچھ اس سے پہلے ہی فوت ہو جاتے ہیں اور کچھ زندہ رہتے ہیں یہاں تک کہ بڑھاپے کی عمرکو پہنچ جاتے ہیں جب قوت اورعقل کمزور ہو جاتی ہے حتی کہ ان کی حالت بچوں سے بھی بدتر ہو جاتی ہے کہ جو کچھ وہ جانتے تھے، سب محو ہو جاتا ہے۔ تم دیکھتے ہو کہ زمین خشک ہوتی ہے، اس میں کوئی سبزہ نہیں ہوتا، پھر جب ہم اس پر بارش کا پانی برساتے ہیں تو وہ نباتات کے ساتھ کھل اٹھتی ہے اور نباتات اگنے سے وہ بلند ہو جاتی ہے اور خوبصورت منظر پیش کرنے والی ہر قسم کی نباتات نکالتی ہے۔