Surja El-A'raf 7:169 الأعراف

Pas tyre erdhën trashëgimtarë të këqij që, pasi e morën Teuratin prej të parëve të tyre, e lexonin dhe nuk punonin sipas porosive të tij. Ata merrnin përfitime të pavlera të kësaj bote dhe ryshfete, me qëllim që të ndryshonin Librin e Allahut dhe të gjykonin jo sipas asaj që ishte zbritur në të, duke i siguruar vetet e tyre se Allahu do t’ua falte të gjitha gjynahet, kështu që, nëse kishin ndonjë përfitim të pavlerë të kësaj bote, ata e merrnin. A nuk kishte marrë Allahu prej tyre besën se nuk do të thoshin në emër të Allahut tjetër përveçse të Vërtetën, pa e ndryshuar e pa e mohuar atë?! Megjithatë, ata nuk e lanë punën sipas Librit për shkak të injorancës, përkundrazi, ata kishin dijeni (të plotë për këtë që po bënin), pasi ata e kishin lexuar atë që ishte në të dhe e kishin mësuar atë, kështu që gjynahi i tyre ishte akoma më i madh. Mirëpo jeta tjetër dhe mirësitë e saj të përjetshme, janë më të mira se përfitimet kalimtare, për ata që ia kanë frikën Allahut, duke zbatuar urdhërimet dhe ndalimet e Tij. Pra, a nuk po e mendojnë këtë ata të cilët e marrin këtë përfitim të pavlerë, se ajo që u ka premtuar Allahu besimtarëve të ruajtur për në Botën Tjetër është më e mirë dhe e përjetshme?!