سورۃ الاعراف 7:169 الأعراف

169- پھر ان کے بعد برے اور نااہل لوگ ان کے جانشین بنے جنھوں نے اپنے بڑوں سے تورات لی۔ وہ اسے پڑھتے تو ہیں مگر اس کے احکام پر عمل نہیں کرتے۔ وہ دنیا کا حقیر اور ردی مال بطور رشوت لے کر اللہ کی کتاب میں تحریف کر دیتے ہیں اور اللہ تعالیٰ کے نازل کردہ احکام سے ہٹ کر فیصلہ کرتے ہیں۔ وہ اللہ سے اپنے بارے میں یہ امید رکھتے ہیں کہ اللہ تعالیٰ ان کے گناہ معاف کر دے گا، حالانکہ ان کے پاس اگر دنیا کا یہ گھٹیا مال دوبارہ بھی آئے تو وہ اسے بار بار لیں گے۔ کیا اللہ تعالیٰ نے ان سے پختہ عہد و پیمان نہیں لیے کہ وہ اللہ کی طرف صرف حق بات منسوب کریں گے جو اس نے کہی ہے، اس میں کوئی تحریف اور تبدیلی نہیں کریں گے؟ اور انھوں نے کتابِ الٰہی پر عمل کرنا جہالت کی بنا پر نہیں چھوڑا بلکہ جانتے بوجھتے چھوڑا ہے۔ انھوں نے اس کے مندرجات کو پڑھا اور سیکھا، پھر ترک کیا، اس لیے ان کا گناہ زیادہ سخت ہے، حالانکہ آخرت کا گھر اور اس گھر میں موجود ہمیشہ رہنے والی نعمتیں اس ختم ہونے والے مال و متاع سے کہیں بہتر ہیں ان لوگوں کے لیے جو اللہ کے حکموں کو مان کر اور اس کے منع کیے ہوئے کاموں سے بازرہ کر اللہ سے ڈرتے ہیں۔ کیا یہ معمولی مال و متاع لینے والے عقل نہیں کرتے کہ اللہ تعالیٰ نے متقین کے لیے جو کچھ آخرت میں تیار کر رکھا ہے، وہ بہتر اور دیرپا ہے؟