Surja El-Bekare 2:145 البقرة

Pafsha Allahun! Edhe nëse ti, o i Dërguar, do t’u sillje atyre që u është dhënë Libri i mëparshëm -hebrenj dhe të krishterë çdo lloj argumenti dhe sqarimi në lidhje me Vërtetësinë e ndryshimit të kibles, ata përsëri nuk kanë për t’u drejtuar nga Kiblja jote, vetëm për shkak të kryeneçësisë ndaj Mesazhit tënd dhe mendjemadhësisë ndaj pasimit të së Vërtetës. Po ashtu, as ti nuk do të kthehesh më nga kiblja e tyre pasi Allahu të largoi prej saj. Asnjëra palë nuk do të drejtohet nga kiblja e palës tjetër, ngaqë secila e shpall mohuese palën tjetër. Nëse ti do të pasoje qejfet e tyre në lidhje me çështjen e Kibles, e të tjera -si ligjet dhe rregullat e fesë-, pasi të erdhi dija e saktë dhe e qartë, atëherë ti do të ishe i padrejtë, duke hequr dorë nga udhëzimi e duke ndjekur qejfet. Kjo formë ligjërimi ndaj të Dërguarit të Allahut صلى الله عليه وسلم tregon sa e kobshme është ndjekja e gjurmëve të pasuesve të Librave të mëparshëm. Allahu e kishte mbrojtur të Dërguarin e Tij nga ndjekja e tyre, por ky ishte paralajmërim për umetin e tij pas tij.