Surja El-Bekare 2:219 البقرة

Të pyesin sahabët e tu për pijen e verës (e cila përfshin çdo gjë që merr mendjen dhe largon logjikën). Ata të pyesin në lidhje me gjykimin e pirjes, shitjes dhe blerjes së verës. Të pyesin ty edhe për gjykimin për bixhozin (i cili përfshin çdo fitim pasurie kur të dyja palët ofrojnë diçka dhe vetëm njëra e fiton). Thuaju atyre se këto sjellin shumë dëme dhe të këqija, si në anën fetare, ashtu edhe në atë materiale; humb logjika dhe pasuria, futja në armiqësi dhe urrejtje etj. Edhe pse ato mund të kenë pak dobi, siç mund të jetë mundësia për të fituar diçka, dëmi që ato sjellin dhe gjynahu i tyre është shumë më i madh se dobia që ato kanë. Për njeriun e logjikshëm, çdo gjë që ka më shumë dëm sesa dobi, është e mjaftueshme që t’i largohet asaj. Ky sqarim i ardhur prej Allahut ishte fillesa e ndalimit gradual të verës dhe të alkoolit. Të pyesin sahabët edhe se çfarë duhet të japin prej pasurisë së tyre, për kontribut dhe bamirësi. Thuaju: “Prej pasurisë tuaj, jepni atë që tepron pasi të plotësoni nevojat tuaja (gjykimi i parë ky, pas të cilit Allahu e caktoi zekatin si një detyrim për pasuritë specifike me kuota të përcaktuara). Kështu, njëlloj si ky sqarim i plotë, Allahu ju bën të qarta të gjitha dispozitat e fesë, me shpresë se do logjikoni.