Surja En-Nur 24:58 النور

Pasi i përmendi obligimet e besimtarëve kundrejt shoqërisë, familjes dhe vetes së tyre, pasi tregoi moralin dhe disa vendime, duke treguar edhe rrezikun e hipokritëve për të ndikuar në shoqërinë e muslimanëve me shpifjet e tyre, përhapjen e imoralitetit dhe moszbatimin e urdhrave të Allahut dhe të Dërguarit të Tij, Allahu u kthehet përsëri porosive në edukimin e qelizës së shoqërisë – familjes, duke thënë:

O ju që besoni Allahun dhe veproni sipas rregullave që ka përcaktuar për ju! Shërbëtorët dhe fëmijët tuaj që nuk e kanë arritur moshën e pjekurisë, duhet t’ju kërkojnë leje kur futen tek ju në këto tri kohë: para namazit të sabahut, kur ndërroni rrobat e gjumit me të zgjimit; në kohën e drekës, kur i hiqni rrobat për të fjetur (lehtë); dhe pas namazit të jacisë (darkës), kur vishen rrobat e gjumit. Këto janë tri kohë për intimitet, kur ata nuk duhet t’ju hyjnë në shtëpi, përveçse me lejen tuaj. Jashtë këtyre rasteve, nuk është problem për ju, që ata të hyjnë pa marrë leje dhe as ata nuk do të jenë të qortuar për këtë, sepse jeni vazhdimisht në lëvizje e në kontakt me njëri-tjetrin dhe është e vështirë ndalimi i hyrjes derisa të marrin leje. Ashtu siç jua tregon rregullat e kërkimit të lejes, Allahu jua sqaron edhe ajetet që argumentojnë dispozitat e tjera që ka përcaktuar për ju. Allahu e di mirë se çfarë është në interes të robërve të Vet, si dhe është i Urtë në çdo rregull që përcakton për ta.