سورۃ البقرہ 2:102 البقرة

102- اور جب انھوں نے اللہ کا دین چھوڑا تو وہ اس کے بدلے میں اس جھوٹ کے پیروکار بن گئے جو اللہ کے نبی سلیمان علیہ السلام کے عہد حکومت میں شیطانوں نے گھڑا ہوا تھا۔ شیاطین نے یہ دعویٰ کر رکھا تھا کہ سیدنا سلیمان علیہ السلام کی حکومت جادو کے بل بوتے پر قائم ہے، حالانکہ سلیمان علیہ السلام نے جادو کے سیکھنے سکھانے کے ذریعے سے کفر نہ کیا تھا، جیسا کہ یہودیوں کا جھوٹا اور باطل زعم تھا۔ شیاطین نے کفر ضرور کیا کیونکہ وہ لوگوں کو جادو سکھاتے تھے اور اس سلسلے میں وہ انھیں وہ جادو بھی سکھاتے تھے جو دو فرشتوں ہاروت اور ماروت پر نازل کیا گیا تھا۔ اللہ تعالیٰ نے لوگوں کی آزمائش کے لیے عراق کے شہر بابل میں دو فرشتوں ہاروت وماروت کو جادو کا علم دے کر اتارا تھا۔ ان فرشتوں سے جو شخص جادو سیکھنے آتا، وہ اسے اس سے ڈراتے، بچنے کی تلقین کرتے اور کہتے کہ یہ نہ سیکھو۔ اس کا سیکھنا تمھارے لیے ناجائز اور کفر ہے۔ ہمیں تمھارے امتحان کے لیے یہ علم دے کر بھیجا گیا ہے، لہٰذا جادو سیکھ کر کفر نہ کرو، پھر جو شخص ان کی نصیحت قبول نہ کرتا، وہ ان سے جادو سیکھ لیتا۔ وہ لوگ جادو کی ایک قسم کے ذریعے سے انتہائی نفرت، دشمنی اور بغض کے بیج بو کر میاں بیوی کے درمیان جدائی ڈال دیتے تھے۔ یاد رہے کہ کوئی جادوگر اللہ تعالیٰ کے حکم و ارادے کے بغیر کسی کا کچھ نہیں بگاڑ سکتا، نیز وہ لوگ ایسی چیز سیکھتے تھے جو انھیں نقصان پہنچاتی اور انھیں فائدہ نہ دیتی تھی۔ ان یہود کو اس بات کا بخوبی علم تھا کہ اللہ کی کتاب چھوڑ کر جادو سیکھنے والا سرا سر نقصان ہی میں ہے اور آخرت میں اس کا کوئی حصہ نہیں۔ اس کے باوجود انھوں نے گھاٹے والا سودا کیا کہ اللہ کی وحی اور شریعت چھوڑ کر جادو کے پیچھے لگ گئے۔ اگر انھیں اپنے صحیح نفع کا ادراک ہوتا تو وہ اس گھناؤنے جرم اور کھلم کھلا گمراہی کی جرأت نہ کرتے۔