سورۃ البقرہ 2:177 البقرة

177- اللہ تعالیٰ کی پسندیدہ نیکی صرف یہ نہیں کہ مشرق یا مغرب کی طرف رخ کیا جائے یا اس میں اختلاف کیا جائے۔ یہ تو اطاعت کی ایک ظاہری علامت ہے۔ اصل نیکی اور خیر تو اس بندے کی ہے جو اللہ تعالیٰ کے معبود یکتا ہونے پر ایمان لائے، یوم آخرت، تمام فرشتوں، ساری آسمانی کتابوں اور بلاتفریق سارے نبیوں پر ایمان لائے۔ حقیقی نیکی تو اس کی ہے جس نے مال کی چاہت اور محبت کے باوجود اسے قرابت داروں، حد بلوغت تک پہنچنے سے پہلے باپ کے سائے سے محروم ہونے والوں، یعنی یتیموں، ضرورت مندوں، اپنے گھر والوں اور وطن سے دور مسافروں اور کسی ضرورت کے تحت مجبوراً سوال کرنے والوں پر خرچ کیا اور گردنوں کو غلامی اور قید سے نکالنے کے لیے مال لگایا۔ اور وہ بندہ بھی نیک ہے جس نے اللہ کے حکم کے مطابق پوری نماز پڑھی، فرض زکاۃ ادا کی اور وہ لوگ بھی نیک ہیں جو عہد کر کے اس کی پاسداری کرتے ہیں، جو فقر و فاقہ، مصائب اور بیماری کے وقت صبر کرتے ہیں اور جہاد و قتال کی سختیوں کو برداشت کرتے ہیں اور راہِ فرار اختیار نہیں کرتے۔ مذکورہ صفات کے حامل افراد ہی اپنے ایمان اور اعمال میں سچے ہیں۔ اور یہی لوگ متقی ہیں کیونکہ انھوں نے اپنے اعمال سے ثابت کیا کہ وہ اللہ کے ہر حکم کی تعمیل کرتے اور اس کے منع کیے ہوئے کاموں سے رک جاتے ہیں۔