Surja El-Maide 5:64 المائدة

Kur i zunë thatësira dhe vështirësitë, judejtë thanë: “Dora e Allahut është e shtrënguar për të dhënë mirësi, Ai nuk po na jep nga ajo që zotëron.” Në fakt, duart e tyre janë të shtrënguara, kur flitet për mirësi dhe dhurime! Ata u përjashtuan prej mëshirës së Allahut për shkak të asaj fjale që thanë. Përkundrazi, të dyja duart e Tij (Qoftë i lartësuar!) janë të hapura në dhurimin e mirësive dhe dhuntive, duke dhuruar ashtu siç Ai dëshiron. Jep apo nuk jep, asgjë nuk mund ta ndalojë e as nuk mund ta detyrojë për këtë. Kjo që të është zbritur ty, o i Dërguar, do t’u shtojë judejve veçse tejkalimin edhe më shumë të kufijve në kundërshtime, për shkak të smirës që ata kanë. Kështu, Ne lëshuam mes grupacioneve të judejve armiqësi dhe urrejtje, ku sa herë ata bashkoheshin për ndonjë luftë e përgatiteshin për të, apo urdhëronin njëri-tjetrin për ndezjen e saj, Allahu i përçante tubimet e tyre e ua largonte fuqinë. Akoma ata e vazhdojnë përpjekjen e tyre për të kryer shkatërrim në tokë, duke u angazhuar në hedhjen poshtë të Islamit dhe ngritjen e kurtheve ndaj tij. Allahu nuk i do njerëzit që prishin.