Surja El-Bekare 2:187 البقرة

Në fillim të Islamit ka qenë e ndaluar për burrat që të flinin në darkë e të ngriheshin natën e agjërimit për të ngrënë, qoftë edhe para agimit, apo të kryenin marrëdhënie me gratë e tyre. Allahu e anuloi këtë rregull, duke e bërë të lejueshme që të kryenin marrëdhënie me gratë gjatë netëve të agjërimit, sepse gratë janë mbulesë dhe prehje për burrat, ashtu siç janë edhe burrat mbulesë dhe prehje për to, domethënë, asnjëra palë nuk mund të bëjë pa tjetrën. Allahu e dinte se ju po gënjenit veten në lidhje me zbatimin e asaj që Ai jua kishte ndaluar, kështu që Ai ju mëshiroi, jua pranoi pendimin dhe ju lehtësoi. Kështu, tani mund të kryeni marrëdhënie me to dhe të kërkoni pasardhës, siç ka caktuar Allahu për ju dhe mund të hani e të pini gjatë gjithë natës, derisa t’ju bëhet e qartë zbardhja e agimit të vërtetë dhe ndarja me errësirën e natës. Pastaj plotësojeni agjërimin prej fillimit të agimit, derisa të perëndojë dielli, duke u përmbajtur prej gjërave që e prishin atë. Me gratë tuaja mos kryeni marrëdhënie kur ju jeni në itikaf, në xhami, sepse kjo e prish itikafin. Këto rregulla janë kufijtë që ka vënë Allahu mes hallallit dhe haramit. Prandaj mos iu afroni atyre, sepse kushdo që iu afrohet kufijve të Allahut, ka mundësinë që të bjerë në haram. Me këtë sqarim të qartë e të kthjellët të këtyre rregullave Allahu shpjegon Argumentet e Veta për njerëzit, me shpresën se ata do të ruhen prej dënimit të Tij, nëse e bëjnë atë që Ai ka urdhëruar dhe e lënë atë që Ai ka ndaluar.