سورۃ البقرہ 2:187 البقرة

187- پہلے پہل آدمی کے لیے یہ حکم تھا کہ جب وہ رمضان کی راتوں میں سو جاتا، پھر فجر سے پہلے اٹھ جاتا تو کھانا کھانا یا بیوی سے مباشرت کرنا اس پر حرام تھا۔ فرمایا: اے اہلِ ایمان! اللہ تعالیٰ نے اس حکم کو منسوخ کر کے تمھارے لیے رمضان کی راتوں میں بیویوں سے جماع کرنا جائز قرار دیا، چنانچہ تمھاری بیویاں تمھارے لیے سترپوشی اور پاکدامنی کا ذریعہ ہیں اور تم ان کے لیے ستر پوشی اور پاک بازی کا سبب ہو۔ تم میں سے کوئی ایک دوسرے سے بے نیاز نہیں ہوسکتا۔ اللہ تعالیٰ کے علم میں تھا کہ تم اللہ تعالیٰ کے منع کردہ کاموں کا ارتکاب کر کے اپنے نفسوں سے خیانت کرو گے، لہٰذا اس نے تم پر رحم کیا، توجہ فرمائی اور تم پر تخفیف اور نرمی کر دی، لہٰذا اب تم رمضان کی رات میں ان سے مباشرت کر سکتے ہو اور اللہ تعالیٰ نے تمھارے مقدر میں جو اولاد رکھی ہے، اسے طلب کرو اور پوری رات طلوعِ فجر تک کھاؤ پیو۔ طلوع فجر سے وہ روشنی مراد ہے جو رات کی تاریکی سے پھوٹتی ہے، پھر طلوعِ فجر سے غروبِ آفتاب تک روزہ توڑنے والے تمام امور سے رک کر روزے کو مکمل کرو۔ تم اپنی بیویوں سے مباشرت نہ کرو اس حال میں کہ تم مساجد میں اعتکاف بیٹھے ہوئے ہو کیونکہ اس سے اعتکاف باطل ہو جائے گا۔ مذکورہ بالا احکام حلال و حرام کے درمیان اللہ تعالیٰ کی حدیں ہیں، لہٰذا کبھی ان کے قریب نہ جانا۔ جو اللہ تعالیٰ کی حدوں کے قریب گیا، ہوسکتا ہے کہ وہ حرام کا ارتکاب کر لے۔ ان احکام کی اس قدر تفصیل اور وضاحت کر کے اللہ تعالیٰ لوگوں کے لیے اپنی آیات کھول کر بیان کر رہا ہے تاکہ وہ اس کے حکموں پر عمل کر کے اور اس کے منع کیے ہوئے کاموں سے باز آ کر اس کے عذاب سے بچ سکیں۔