Surja Ali Imran 3:154 آل عمران

Pastaj, pas dhembjes dhe ngushtësisë, Allahu zbriti mbi ju qetësi dhe siguri, duke bërë që një grup prej jush – ata që ishin të bindur në premtimin e Tij – t’i kapte një gjumë i lehtë, për shkak të sigurisë dhe qetësisë në zemrat e tyre. Ndërsa grupi tjetër nuk ndihej i sigurt e nuk e zuri gjumi. Këta ishin hipokritët, të cilët nuk kishin shqetësim tjetër, veç shpëtimit të vetes; prandaj ishin në ankth dhe frikë. Ata kishin një mendim të keq për Allahun- se Allahu nuk do t'i ndihmonte të Dërguarin e Vet dhe robtë e Vet- ashtu siç mendonin njerëzit në kohën e injorancës (para Islamit), të cilët nuk e madhëronin Allahun ashtu si i takonte. Të tillë hipokritë, për shkak të injorancës që kishin lidhur me Allahun, thoshin: “Nuk ishte ideja jonë që të dilnim e të luftonim se, sikur të kishte qenë, nuk do të kishim dalë.” Thuaju, o i Dërguar, si përgjigje për ta: “Gjithë çështja është vetëm në dorën e Allahut, Ai cakton si të dëshirojë, gjykon si të dojë; kështu që ishte Ai që e kishte caktuar daljen tuaj.” Hipokritët brenda vetes fshehin dyshime dhe mendime jo të mira, të cilat nuk t’i shfaqin ty, aq sa edhe thonë: “Po të ishte për ne, nuk do ishim vrarë në këtë vend.” Thuaju, o i Dërguar, si kundërpërgjigje: “Edhe nëse do të kishit qenë në shtëpitë tuaja, larg vendeve ku ndodhën vrasjet dhe vdekjet, nëse Allahu ia kishte caktuar dikujt që të vritej, do të kishte shkuar aty ku ata u vranë. Allahu e caktoi atë veçse që të vinte në provë qëllimet në kraharorin tuaj, duke e ndarë besimin prej hipokrizisë. Allahu është i Gjithëditur për atë që është në gjokset e robve të Vet e Atij nuk i fshihet asgjë.