Surja En-Nisa 4:12 النساء

Juve, o bashkëshortë ju takon gjysma e pasurisë që kanë lënë bashkëshortet tuaja, nëse ato nuk kanë fëmijë – qoftë mashkull apo femër – me ju apo me ish-bashkëshortë të tjerë; por nëse ato kanë fëmijë - qoftë mashkull apo femër – atëherë juve ju përket një e katërta e pasurisë që ato kanë lënë dhe ju ndahet pasi t’u jetë përmbushur testamenti që ato kanë lënë dhe t’u jenë paguar borxhet. Edhe bashkëshorteve u takon një e katërta e asaj që u lini ju, o bashkëshortë, nëse ju nuk keni fëmijë – qoftë mashkull apo femër – të lindur me to apo me bashkëshorte të tjera. Nëse ju keni fëmijë, qoftë mashkull apo femër, atëherë atyre u takon një e teta e asaj që ju lini dhe ju ndahet pasi t’ju jetë përmbushur testamenti që keni lënë dhe t’ju jenë paguar borxhet. Nëse vdes një burrë a grua, që nuk ka as prindër e as fëmijë, por secili prej tyre ka vëlla për nëne apo motër për nëne, secilit prej tyre, qoftë vëlla apo motër nga nëna, i përket një e gjashta. Nëse vëllezërit apo motrat nga nëna janë më shumë se një, atëherë të gjithëve së bashku u përket një e treta, duke marrë pjesë bashkërisht në të, në mënyrë të barabartë, si meshkujt edhe femrat; por këtë pjesë të tyre e marrin vetëm pasi të jetë përmbushur testamenti i të vdekurit dhe të jenë paguar borxhet e tij, me kushtin që testamenti të mos u hyjë në hak trashëgimtarëve, duke i dëmtuar (siç mund të jetë testamenti që lë më shumë se një të tretën e pasurisë). Kjo dispozitë, të cilin e përmban ajeti, është besa juaj me Allahun. Allahu e di shumë mirë se çfarë është në dobi të robve të Vet, si në këtë botë, ashtu edhe në Botën Tjetër dhe është i Butë e nuk ia përshpejton gjynahqarit ndëshkimin.