Surja En-Nisa 4:11 النساء

Allahu ju urdhëron dhe kërkon prej jush që t’u përmbaheni të drejtave në lidhje me trashëgiminë e fëmijëve tuaj, që trashëgimia, që ndahet mes tyre, të jetë: për djalin sa pjesa e dy vajzave. Nëse i vdekuri lë pas vajza dhe asnjë djalë, atëherë dy e më shumë vajzave u përkasin dy të tretat e pasurisë. Nëse është vajzë e vetme, atëherë asaj i përket gjysma e asaj, që ai ka lënë. Secilit prindër të të vdekurit i përket një e gjashta e asaj që ai ka lënë, nëse ai ka lënë një pasardhës -djalë apo vajzë qoftë. Nëse ai nuk ka pasardhës dhe asnjë që ta trashëgojë, përveç dy prindërve të vet, atëherë nënës i takon një e treta, kurse pjesa tjetër i lihet trashëgim babait të tij. Nëse i vdekuri ka pasur dy e më shumë vëllezër apo motra, qofshin prej një lindjeje (nga të njëjtët nënë e baba, ose jo), atëherë nënës i përket patjetër një e gjashta, ndërsa pjesa tjetër i përket plotësisht babait e nuk u lihet asgjë vëllezërve apo motrave. Kjo ndarje e trashëgimisë bëhet pasi të jetë çuar në vend testamenti, amaneti që i vdekuri ka lënë më parë, me kusht që testamenti i tij të mos e tejkalojë një të tretën e pasurisë dhe me kusht që të jenë paguar borxhet që ai ka lënë. Vërtet që Allahu i Lartësuar e ka bërë ndarjen e trashëgimisë në këtë mënyrë, sepse ju nuk e dini se cili prej prindërve apo fëmijëve është më i dobishëm për ju, qoftë në këtë botë, qoftë në Botën Tjetër, sepse mund të ndodhë që dikush, para se të vdesë, të ketë mendim të mirë për ndonjërin prej trashëgimtarëve, kështu që ia dhuron të gjithë pasurinë vetëm atij, apo mund të ketë mendim të keq për të dhe nuk i jep asgjë, ndërkohë që realiteti mund të jetë ndryshe. I Vetmi që i di të gjitha këto është Allahu, të Cilit nuk i fshihet asgjë; prandaj Ai e ndau trashëgiminë siç e sqaroi më lart dhe e konsideroi atë farz nga ana e Tij ndaj robve të Vet. Allahu është i Gjithëditur dhe se Atij nuk i fshihet asgjë që është në interes të robve të Vet. Ai është i Urtë në vënien e ligjeve dhe në drejtim.