سورۃ البقرہ 2:196 البقرة

196- اللہ تعالیٰ کی رضا حاصل کرنے کے لیے حج و عمرہ پورا کرو اور اگر دشمن کے روکنے یا بیماری وغیرہ کی وجہ سے تم روک دیے جاؤ تو حلال ہونے، یعنی حالتِ احرام سے نکلنے کے لیے اونٹ یا گائے یا بکری میں سے جو بھی قربانی میسر ہو، اسے ذبح کردو۔ اور اپنے سر کے بال اس وقت تک نہ منڈاؤ یا نہ کٹاؤ جب تک قربانی کا جانور اپنے ذبح کے مقام پر (حدود حرم میں) نہ پہنچ جائے۔ اگر حرم تک جانے سے روک دیا جائے تو اسی مقام پر ذبح کر دو جہاں اسے روکا گیا ہے۔ اگر حرم تک پہنچنے میں کوئی رکاوٹ نہ ہو تو یوم النحر اور ایام تشریق میں حدود حرم میں ذبح کرو۔ اگر تم میں سے کوئی شخص بیمار ہو یا اس کے سر میں جوؤں وغیرہ کی تکلیف ہو اور وہ اس وجہ سے سر منڈا دے تو اس پر کوئی گناہ نہیں، تاہم اس کے لیے فدیے کے طور پر تین روزے رکھنا یا حرم کے چھ مساکین کو کھانا کھلانا یا ایک بکری ذبح کر کے حرم کے فقراء میں تقسیم کرنا ضروری ہوگا۔ اور جب تم خطرے سے باہر امن کی حالت میں ہو تو جو شخص حج کے مہینوں میں عمرے کا فائدہ اٹھائے اور پھر اس سال کے حج کا احرام باندھنے تک احرام کی پابندیوں سے آزاد رہے تو وہ جو بکری میسر ہو، اسے ذبح کر دے، یا اونٹ، گائے میں سات افراد شراکت کر کے اس کی قربانی کر لیں۔ اور جو ہدی (قربانی) کی استطاعت نہ رکھتا ہو، وہ اس کے بدلے میں پورے دس دنوں کے روزے رکھے۔ تین حج کے دنوں میں اور سات گھر لوٹ کر۔ احرام کی پابندیوں سے آزادی سے مستفید ہونے کی صورت میں قربانی کا وجوب یا اس سے عاجز آنے کی صورت میں روزوں کا اہتمام کرنا صرف اس کے لیے ہے جو اہلِ حرم میں سے نہ ہو اور جو حرم کے قریب نہ رہتا ہو۔ اللہ تعالیٰ کی شریعت کا اتباع کر کے اور اس کی حدوں کی تعظیم کر کے اس سے ڈرو اور جان لو کہ جو اس کے حکم کی مخالفت کرے، اس کے لیے اس کی پکڑ بھی بڑی سخت ہے۔