Surja El-Bekare 2:196 البقرة

Kryejini me rigorozitet Haxhin dhe Umren, duke synuar vetëm kënaqësinë e Allahut të Lartësuar! Nëse gjatë rrugës bllokoheni nga ndonjë sëmundje, armik apo rrethana të tjera që ju pengojnë t’i kryeni këto dy rite, atëherë bëni kurban një kafshë që e keni më të lehtë – deve, lopë a bagëti të imta – në mënyrë që të liroheni nga gjendja e ihramit! Mos e rruani kokën ose mos i shkurtoni flokët, derisa kafsha e caktuar për kurban të mbërrijë në vendin ku lejohet therja e tij! Nëse kafsha e kurbanit pengohet të hyjë në Mekë, atëherë le të theret aty ku e ndalojnë, përndryshe le të theret në Mekë, ditën e Bajramit të Kurbanit ose në tri ditët në vazhdim! E nëse dikush prej jush është i sëmurë, apo ka problem me flokun dhe për këtë arsye e rruan kokën para se të theret kurbani, atëherë kjo nuk përbën shkelje, sepse mjafton që ai ta kompensojë atë ose nëpërmjet agjërimit të tri ditëve, ose duke ushqyer gjashtë veta prej të varfërve të Mekës, ose duke therur një dele e duke ua shpërndarë atë fukarenjve të Mekës. Kush ndihet i sigurt dhe dëshiron që të bëjë një umre para Haxhit (gjatë muajve të Haxhit), duke u liruar kështu nga ndalesat e ihramit gjersa ta veshë atë sërish për të kryer haxhin, le të therë një kurban! Kurbani mund të jetë bagëti e imët (dele ose dhi) për një person ose të mblidhen shtatë vetë e të bëjnë kurban një lopë a një deve. Por nëse nuk gjeni dot kafshë për ta bërë kurban apo nuk keni mundësi financiare, atëherë agjëroni tri ditë gjatë Haxhit dhe shtatë ditë të tjera pasi të ktheheni në familjet tuaja! E kështu bëhen dhjetë ditë të plota. Ky lloj Haxhi që paraprihet nga një umre (haxh temetu) është i ligjëruar vetëm për ata që nuk banojnë në Mekës apo në rrethinat e saj. Prandaj, kijeni frikë Allahun, o njerëz, duke respektuar ligjet dhe kufijtë që Ai ka caktuar! Dhe dijeni se Allahu i ndëshkon ashpër ata që thyejnë urdhrat e Tij!