سورۃ البقرہ 2:220 البقرة

220- شریعت کے یہ احکام اس لیے دیے گئے ہیں تاکہ تم اس چیز میں غور و فکر کرو جو تمھیں دنیا و آخرت میں نفع دے۔ اے نبی! آپ کے صحابہ آپ سے یتیموں کی سرپرستی کرنے کے بارے میں پوچھتے ہیں کہ وہ ان کے ساتھ کیا طرز عمل اپنائیں؟ کیا خرچ کرنے اور کھانے پینے میں ان کے مال اپنے مالوں کے ساتھ ملا لیں اور رہائش بھی مشترک کر لیں؟ آپ انھیں جواب دیں: اگر تم رضا کارانہ طور پر ان کے اموال کی دیکھ بھال کرو اور کوئی معاوضہ نہ لو اور انھیں اپنے مالوں کے ساتھ نہ ملاؤ تو اللہ کے ہاں یہ تمھارے لیے بہتر ہے اور زیادہ اجر کا باعث بھی، نیز یہ ان کے مالوں کے لیے زیادہ بہتر ہے کیونکہ اس میں ان کے مالوں کی حفاظت ہے۔ اگر تم ان کے مال اپنے مالوں کے ساتھ ملا کر رہن سہن اور کھانا پینا وغیرہ مشترک رکھو تو بھی اس میں کوئی گناہ نہیں۔ وہ تمھارے دینی بھائی ہیں اور بھائی ایک دوسرے کے معاون ہوتے ہیں، ایک دوسرے کے کام آتے ہیں اور اللہ جانتا ہے کہ کون سا سرپرست یتیم کے مال کو ضائع اور تباہ کرنے کے لیے اپنے مال کے ساتھ ملاتا ہے اور کون یتیم کے مال کی اصلاح کے لیے ایسا کرتا ہے۔ اگر اللہ تعالیٰ یتیموں کے بارے میں تم پر مشقت ڈالنا چاہتا تو مشقت ڈال سکتا تھا لیکن اس نے تمھارے لیے ان کے ساتھ معاملہ کرنے کی راہ آسان رکھی کیونکہ اس کی شریعت آسانی پر مبنی ہے۔ بلاشبہ اللہ تعالیٰ سب پر غالب ہے اور اس پر کوئی چیز غالب نہیں آسکتی۔ وہ اپنی تخلیق، تدبیر اور شریعت سازی میں کمال حکمت والا بھی ہے۔