سورۃ النساء 4:11

11- اللہ تعالیٰ تمھیں اولاد کی وراثت کے معاملے میں پابند کرتا اور حکم دیتا ہے کہ ان کے درمیان میراث اس طرح تقسیم کی جائے کہ ایک بیٹے کو دو بیٹیوں کے برابر حصہ ملے۔ اگر مرنے والے کا کوئی بیٹا نہیں، صرف بیٹیاں ہیں، اور بیٹیوں کی تعداد دو یا دو سے زیادہ ہے تو انھیں کل ترکے کا دو تہائی (µ) ملے گا اور اگر صرف ایک بیٹی ہے تو اسے کل مال کا آدھا (°) ملے گا۔ مرنے والے کے والدین اگر زندہ ہوں تو ان میں سے ہر ایک کو کل ترکے کا چھٹا حصہ (³) ملے گا۔ والدین کا یہ حصہ اس صورت میں ہے جب مرنے والے کی اولاد بیٹے یا بیٹیاں موجود ہوں اور اگر اولاد نہ ہو اور ماں باپ کے علاوہ کوئی وارث بھی نہ ہو تو اس صورت میں مرنے والے کی ماں کو تیسرا حصہ (±) ملے گا اور باقی سارا مال باپ کا ہوگا۔ اگر مرنے والے کے ماں باپ موجود ہوں اور اس کے سگے یا سوتیلے دو یا دو سے زیادہ بہن بھائی بھی ہوں تو اس کی ماں کووراثت میں مقرر کردہ حصے کے مطابق چھٹا حصہ (³) ملے گا اور باقی سارا مال بطور عصبہ باپ کو ملے گا اور بہن بھائیوں کو اس صورت میں کچھ نہیں ملے گا۔ وراثت کی یہ تقسیم اس وصیت کو پورا کرنے کے بعد ہوگی جو مرنے والے نے کی ہو بشرطیکہ وہ وصیت کل مال کے ایک تہائی (±) سے زیادہ نہ ہو اور تقسیم سے پہلے میت کا قرض بھی ادا کیا جائے گا۔ میراث کی یہ تقسیم اللہ تعالیٰ نے خود اس طرح مقرر کی ہے کیونکہ تم نہیں جانتے کہ ماں باپ یا اولاد میں سے دنیا و آخرت میں کون تمھارے لیے زیادہ نفع بخش ہے۔ بسا اوقات مرنے والا کسی ایک وارث کے بارے میںاچھا گمان کر کے ساری وراثت اسے دے دیتا ہے یا کسی کے ساتھ برا گمان کر کے اسے اس سے محروم کر دیتا ہے، حالانکہ حقیقت اس کے برعکس ہوتی ہے۔ ان سب باتوں کو وہ اللہ جانتا ہے جس سے کوئی چیز پوشیدہ نہیں، اس لیے اس نے خود وراثت کی واضح تقسیم کر دی اور اس کا نفاذ اپنے بندوں پر فرض کر دیا۔ بلاشبہ اللہ تعالیٰ سب کچھ جاننے والا ہے جس پر بندوں کی مصلحت کا کوئی پہلو مخفی نہیں۔ وہ اپنی شریعت سازی اور تدبیر میں کمال حکمت والا ہے۔