Surja El-Maide 5:2 المائدة

O ju që besoni! Mos i cenoni kufijtë e Allahut, të cilët Ai ju ka urdhëruar t’i madhëroni! Largohuni nga gjërat që ndalohen në ihram, siç janë: veshja e rrobave të qepura apo gjuetia! Mos e quani të lejuar luftën në muajt e shenjtë, të cilët janë: Dhul’kade, Dhul’hixhe, Muharrem dhe Rexheb! Mos i cenoni kurbanet që dhurohen për Qabenë, duke i grabitur a duke i penguar që të arrijne atje, ku edhe flijohen për hir të Allahut! Mos i prekni as kafshët që kanë qafore prej leshi a të ngjashme, shenjë treguese kjo se ato janë kurbane për t’u dhuruar! Mos i sulmoni rrugëtarët për në Shtëpinë e Shenjtë të Allahut, që synojnë edhe fitimin e tregtisë, edhe fitimin e Kënaqësisë së Allahut. Kur të liroheni nga ihrami e të keni dalë prej kufizimeve që ju vë ai, atëherë mund të bëni gjueti, nëse dëshironi. Le të mos ju shtyjë urrejtja që keni ndaj një populli, i cili ju pengonte më parë për të vizituar Xhaminë e Shenjtë, që të bëni padrejtësi ndaj tyre! O besimtarë, ndihmojeni njëri-tjetrin në zbatimin e detyrimeve e të ndalimeve dhe mos bashkëpunoni në kryerjen e gjynaheve, sepse kjo ju ngarkon me barrë të rëndë! Mos merrni pjesë në padrejtësinë ndaj njerëzve, në cenimin e gjakut, të pasurisë dhe nderit të tyre! Kijeni frikë Allahun, duke iu përkushtuar Atij e duke iu larguar kundërshtimit të Tij, pasi Ai i ndëshkon ashpër ata që e kundërshtojnë! Prandaj ruhuni prej ndëshkimit të Tij!