سورۃ المائدہ 5:2 المائدة

2- اے ایمان والو! اللہ تعالیٰ نے جن حرمت والی چیزوں کی تعظیم کا تمھیں حکم دیا ہے، تم ان کی حرمتوں کو پامال نہ کرو۔ حالتِ احرام میں جن چیزوں کے قریب جانے سے روکا گیا ہے، ان سے رک جاؤ، جیسے سلا ہوا لباس اور حرم کی دیگر ممنوعات جیسے شکار وغیرہ۔ اور حرمت والے مہینوں (ذوالقعدہ، ذوالحجہ، محرم اور رجب) میں لڑائی کو حلال نہ سمجھو۔ اسی طرح جو چوپائے بطور ہَدی (قرباني) بیت اللہ کی طرف بھیجے جاتے ہیں تاکہ وہاں ذبح کیے جائیں، انھیں غصب کر کے یا بیت اللہ جانے سے روک کر اپنے لیے حلال نہ سمجھ لو۔ اسی طرح ان چوپایوں کو بھی حلال نہ سمجھو جنھیں نشانی کے طور پر اون وغیرہ کے ہار پہنائے گئے ہوں کہ یہ بیت اللہ کی قربانی ہے۔ تم اللہ کے حرمت والے گھر کا قصد کرنے والوں کو بھی نہ لوٹو جو تجارتی نفع اور اللہ تعالیٰ کی خوشنودی چاہتے ہیں۔ جب تم حج اور عمرے کے احرام سے آزاد ہو جاؤ اور حدود حرم سے نکل آؤ تو پھر چاہو تو شکار کر لو۔ کسی قوم کا بغض کہ انھوں نے تمھیں مسجد الحرام سے روکا، تمھیں ظلم کرنے اور عدل وانصاف کا دامن چھوڑنے پر آمادہ نہ کرے۔ اے مومنو! تمھیں جن کاموں کے کرنے کا حکم دیا گیا ہے اور جن باتوں سے منع کیا گیا ہے، ان میں ایک دوسرے سے تعاون کرو۔ نافرمانی کے کاموں میں، جن کا مرتکب گناہ گار ہوتا ہے، اور لوگوں کے خونوں، مالوں اور عزتوں میں ظلم و زیادتی کرنے میں ایک دوسرے کا تعاون نہ کرو۔ اللہ تعالیٰ کی اطاعت لازم پکڑتے ہوئے اور اس کی معصیت و نافرمانی سے دور ہوتے ہوئے اس سے ڈرو۔ اللہ تعالیٰ اپنے نافرمان کو سخت سزا دینے والا ہے، لہٰذا اس کی سزا اور پکڑ سے ڈرو۔