Surja El-Maide 5:89 المائدة

Allahu nuk ju kërkon llogari, o besimtarë, për betimet tuaja të paqëllimshme, për të cilat ju rrëshqet gjuha, por Ai do t’ju marrë në llogari për ato që ju i keni bërë qëllimisht, me zemër dhe nuk i mbani. Megjithatë, Allahu jua fshin gjynahun për betimin e pambajtur, nëse e shlyeni në njërën prej këtyre mënyrave: duke ushqyer dhjetë nevojtarë me ushqim mesatar të vendit tuaj, për çdo nevojtar nga gjysmë Sa', (rreth 3 kg afërsisht), ose duke u dhënë atyre veshje normale, ose duke liruar një besimtar nga robëria. Nëse nuk keni mundësi për asnjërën nga këto të tria, atëherë shlyjeni duke agjëruar tri ditë. Kjo që u përmend do të jetë shlyerje për betimin që keni bërë, o besimtarë, nëse jeni betuar në Allahun dhe nuk e keni mbajtur atë. Ruajini premtimet tuaja, duke mos bërë betime të rreme dhe të shumta! Mos e thyeni betimin, përveç kur mosmbajtja e tij do të ishte mirësi. Në këtë rast, bëni mirësinë dhe lëreni betimin. Kështu siç ju sqaroi shpagimin e betimeve tuaja, Allahu ju sqaron të gjitha dispozitat e Tij të qarta të hallallit dhe të haramit, e ndoshta ju do të tregoheni mirënjohës ndaj Allahut, që ju mësoi atë që nuk e dinit.