Mürsəlat surəsi

وَٱلۡمُرۡسَلَٰتِ عُرۡفٗا ۝١

And olsun bir-birinin ardınca göndərilənlərə (küləklərə, mələklərə yaxud peyğəmbərlərə)

فَٱلۡعَٰصِفَٰتِ عَصۡفٗا ۝٢

və şiddətlə əsənlərə (küləklərə və ya mələklərə)!

وَٱلنَّٰشِرَٰتِ نَشۡرٗا ۝٣

And olsun (Allahın əmrini) yaydıqca yayanlara,

فَٱلۡفَٰرِقَٰتِ فَرۡقٗا ۝٤

(haqqı batildən) ayırdıqca ayıranlara

فَٱلۡمُلۡقِيَٰتِ ذِكۡرًا ۝٥

və zikri (peyğəmbərlərə) çatdıranlara –

عُذۡرًا أَوۡ نُذۡرًا ۝٦

üzr diləmək və ya qorxutmaq üçün (çatdıranlara)!

إِنَّمَا تُوعَدُونَ لَوَٰقِعٞ ۝٧

Sizə vəd edilən (Qiyamət) mütləq vaqe olacaqdır.

فَإِذَا ٱلنُّجُومُ طُمِسَتۡ ۝٨

Ulduzlar sönəcəyi zaman;

وَإِذَا ٱلسَّمَآءُ فُرِجَتۡ ۝٩

Göy yarılacağı zaman;

وَإِذَا ٱلۡجِبَالُ نُسِفَتۡ ۝١٠

Dağlar yerindən qoparılıb havada toz kimi uçacağı zaman;

وَإِذَا ٱلرُّسُلُ أُقِّتَتۡ ۝١١

Elçilərə (ümmətlərinə şahidlik etmələri üçün) vaxt təyin ediləcəyi zaman

لِأَيِّ يَوۡمٍ أُجِّلَتۡ ۝١٢

(Belə deyiləcəkdir:) "(Bunlara) hansı günə qədər möhlət verilmişdir?"

لِيَوۡمِ ٱلۡفَصۡلِ ۝١٣

(Cavabında deyiləcəkdir:) “(Haqqı batildən, xoşbəxti bədbəxtən) ayırd ediləcəyi günə qədər!”

وَمَآ أَدۡرَىٰكَ مَا يَوۡمُ ٱلۡفَصۡلِ ۝١٤

(Ey Peyğəmbər!) Sən nə bilirsən ayırd etmə günü nədir?!

وَيۡلٞ يَوۡمَئِذٖ لِّلۡمُكَذِّبِينَ ۝١٥

O gün (Qiyaməti) yalan sayanların vay halına!

أَلَمۡ نُهۡلِكِ ٱلۡأَوَّلِينَ ۝١٦

Məgər Biz əvvəlkiləri həlak etmədikmi?!

ثُمَّ نُتۡبِعُهُمُ ٱلۡأٓخِرِينَ ۝١٧

Sonra axırda gələnləri də onlara qatacağıq.

كَذَٰلِكَ نَفۡعَلُ بِٱلۡمُجۡرِمِينَ ۝١٨

Biz günahkarlarla belə edərik.

وَيۡلٞ يَوۡمَئِذٖ لِّلۡمُكَذِّبِينَ ۝١٩

O gün (Qiyaməti) yalan sayanların vay halına!

أَلَمۡ نَخۡلُقكُّم مِّن مَّآءٖ مَّهِينٖ ۝٢٠

(Ey insanlar!) Məgər Biz sizi dəyərsiz bir sudan (nütfədən) xəlq etmədikmi?

فَجَعَلۡنَٰهُ فِي قَرَارٖ مَّكِينٍ ۝٢١

Biz onu (nütfəni) möhkəm bir yerdə (ana bətnində) yerləşdirdik.

إِلَىٰ قَدَرٖ مَّعۡلُومٖ ۝٢٢

Məlum bir vaxta qədər.

فَقَدَرۡنَا فَنِعۡمَ ٱلۡقَٰدِرُونَ ۝٢٣

Biz (nütfədən insan yaratmağa) qadir olduq. Nə gözəl Qadir olanlarıq Biz!

وَيۡلٞ يَوۡمَئِذٖ لِّلۡمُكَذِّبِينَ ۝٢٤

O gün (Qiyaməti) yalan sayanların vay halına!

أَلَمۡ نَجۡعَلِ ٱلۡأَرۡضَ كِفَاتًا ۝٢٥

Məgər Biz yeri məskən etmədikmi –

أَحۡيَآءٗ وَأَمۡوَٰتٗا ۝٢٦

dirilərə və ölülərə?

وَجَعَلۡنَا فِيهَا رَوَٰسِيَ شَٰمِخَٰتٖ وَأَسۡقَيۡنَٰكُم مَّآءٗ فُرَاتٗا ۝٢٧

Biz orada möhkəm dayanan uca dağlar yaratdıq və sizə şirin su içirtdik.

وَيۡلٞ يَوۡمَئِذٖ لِّلۡمُكَذِّبِينَ ۝٢٨

O gün (Qiyaməti) yalan sayanların vay halına!

ٱنطَلِقُوٓاْ إِلَىٰ مَا كُنتُم بِهِۦ تُكَذِّبُونَ ۝٢٩

(Onlara belə deyiləcəkdir:) “Gedin (dünyada) yalan hesab etdiyinizə (Cəhənnəm əzabına)!

ٱنطَلِقُوٓاْ إِلَىٰ ظِلّٖ ذِي ثَلَٰثِ شُعَبٖ ۝٣٠

(Cəhənnəm tüstüsündən) üç qola ayrılan kölgəsinə gedin!”

لَّا ظَلِيلٖ وَلَا يُغۡنِي مِنَ ٱللَّهَبِ ۝٣١

Ora nə kölgə salar, nə də alovdan qoruyar.

إِنَّهَا تَرۡمِي بِشَرَرٖ كَٱلۡقَصۡرِ ۝٣٢

O (Cəhənnəm) saray boyda qığılcımlar püskürər.

كَأَنَّهُۥ جِمَٰلَتٞ صُفۡرٞ ۝٣٣

Sanki o (qığılcımlar) qara dəvələrdir.

وَيۡلٞ يَوۡمَئِذٖ لِّلۡمُكَذِّبِينَ ۝٣٤

O gün (Qiyaməti) yalan sayanların vay halına!

هَٰذَا يَوۡمُ لَا يَنطِقُونَ ۝٣٥

Bu, onların (günahkarların) danışa bilməyəcəkləri (bir) gündür.

وَلَا يُؤۡذَنُ لَهُمۡ فَيَعۡتَذِرُونَ ۝٣٦

Onlara üzrxahlıq üçün izin belə verilməyəcəkdir.

وَيۡلٞ يَوۡمَئِذٖ لِّلۡمُكَذِّبِينَ ۝٣٧

O gün (Qiyaməti) yalan sayanların vay halına!

هَٰذَا يَوۡمُ ٱلۡفَصۡلِۖ جَمَعۡنَٰكُمۡ وَٱلۡأَوَّلِينَ ۝٣٨

Bu (gün, haqqı batildən) ayırd etmə günüdür. (Ey kafirlər!) Biz həm sizi, həm də əvvəlkiləri (bir yerə) cəm etdik!

فَإِن كَانَ لَكُمۡ كَيۡدٞ فَكِيدُونِ ۝٣٩

Əgər hiyləniz varsa, Mənə qarşı hiylə qurun!

وَيۡلٞ يَوۡمَئِذٖ لِّلۡمُكَذِّبِينَ ۝٤٠

O gün (Qiyaməti) yalan sayanların vay halına!

إِنَّ ٱلۡمُتَّقِينَ فِي ظِلَٰلٖ وَعُيُونٖ ۝٤١

Şübhəsiz ki, müttəqilər kölgəliklərdə, çeşmələr başında

وَفَوَٰكِهَ مِمَّا يَشۡتَهُونَ ۝٤٢

və iştahları çəkdiyi meyvələr içində olacaqlar.

كُلُواْ وَٱشۡرَبُواْ هَنِيٓـَٔۢا بِمَا كُنتُمۡ تَعۡمَلُونَ ۝٤٣

(Onlara belə deyiləcəkdir:) “Etdiyiniz (saleh) əməllərinizə görə nuşcanlıqla yeyin-için!

إِنَّا كَذَٰلِكَ نَجۡزِي ٱلۡمُحۡسِنِينَ ۝٤٤

Biz yaxşı əməl sahiblərini belə mükafatlandırırıq!”

وَيۡلٞ يَوۡمَئِذٖ لِّلۡمُكَذِّبِينَ ۝٤٥

O gün (Qiyaməti) yalan sayanların vay halına!

كُلُواْ وَتَمَتَّعُواْ قَلِيلًا إِنَّكُم مُّجۡرِمُونَ ۝٤٦

(Kafirlərə belə deyiləcəkdir:) “Yeyin və (dünyada) bir az əylənin! Həqiqətən, siz günahkarlarsınız!

وَيۡلٞ يَوۡمَئِذٖ لِّلۡمُكَذِّبِينَ ۝٤٧

O gün (Qiyaməti) yalan sayanların vay halına!

وَإِذَا قِيلَ لَهُمُ ٱرۡكَعُواْ لَا يَرۡكَعُونَ ۝٤٨

Onlara: “Rüku edin (namaz qılın)!”– deyildiyi zaman rüku etməzlər (namaz qılmazlar).

وَيۡلٞ يَوۡمَئِذٖ لِّلۡمُكَذِّبِينَ ۝٤٩

O gün (Qiyaməti) yalan sayanların vay halına!

فَبِأَيِّ حَدِيثِۭ بَعۡدَهُۥ يُؤۡمِنُونَ ۝٥٠

Onlar bundan (Qurandan) sonra hansı sözə inanacaqlar?!