سورۃ النساء 4:46

46- یہود میں سے ایک گروہ نہایت برا ہے جو اس کلام کو بدل دیتے ہیں جو اللہ تعالیٰ نے نازل کیا۔ وہ اس کی تاویل اس سے ہٹ کر کرتے ہیں جو اللہ تعالیٰ نے نازل کیا ہے۔ جب رسول صلى اللہ عليہ وسلم انھیں کوئی حکم دیتے ہیں تو وہ کہتے ہیں: ’’ہم نے آپ کی بات سنی اور آپ کے حکم کی نافرمانی کی۔‘‘ وہ مذاق کرتے ہوئے کہتے ہیں: ’’ہم جو کہتے ہیں، سنیے۔ آپ نہ سن پائیں۔‘‘ اور ﴿رَاعِنَا﴾ کے لفظ سے یہ باور کراتے ہیں کہ وہ کہہ رہے ہیں کہ ہماری بات پر بھی توجہ دیجیے، حالانکہ وہ اس سے رعونت (اوچھا پن) مراد لیتے ہیں۔ وہ اس کے ساتھ اپنی زبانوں کو ٹیڑھا کرتے ہیں، مقصد آپ کو بددعا دینا اور دین پر طعن کرنا ہوتا ہے۔ اگر وہ اپنے قول ’’ہم نے آپ کی بات سنی اور آپ کے حکم کی نافرمانی کی۔‘‘کی جگہ کہتے: ’’ہم نے آپ کی بات سنی اور آپ کے حکم کو مانا‘‘ اور ’’سنیے۔ آپ کو سنائی نہ دے۔‘‘کی جگہ ’’آپ سنیے‘‘ کہتے اور رَاعِنا کی جگہ اُنْظُرْنَا کہتے: ہمارا انتظار کیجیے تاکہ ہم آپ کی بات سمجھ لیں تو یہ ان کے حق میں پہلی بات سے بہت بہتر اور عدل کے زیادہ قریب ہوتا کیونکہ اس میں وہ حسنِ ادب ہے جو نبیٔ اکرم صلى اللہ عليہ وسلم کے شایانِ شان ہے۔ لیکن اللہ تعالیٰ نے ان پر لعنت کی اور ان کے کفر کے سبب انھیں اپنی رحمت سے دور کر دیا، چنانچہ وہ ایسا ایمان نہیں لاتے جو انھیں نفع دے۔