Surja El-Bekare 2:275 البقرة

Pasi Allahu i Lartësuar nxiti besimtarët për të dhuruar në Rrugë të Tij, nëpërmjet bashkëpunimit dhe ndihmës së ndërsjellë mes myslimanëve, u bëri thirrje të bëjnë kujdes nga ajo që është e kundërta e saj, që është kamata. Allahu thotë:

Sa u përket atyre që merren me kamatën dhe përfitojnë prej saj, Ditën e Ringjalljes ata do të ngrihen prej varreve ashtu siç ngrihet i prekuri nga shejtani, që përpëlitet si i sëmuri nga epilepsia. Kjo, për arsye se ata i kanë lejuar vetes fitimin prej kamatës, duke mos bërë dallim mes fajdes dhe fitimit të lejuar me anë të tregtisë dhe thonë: “Në fakt, fitimi me tregti është si fitimi me kamatë në qenien e tij hallall, sepse të dyja synojnë shtimin e pasurisë.” Allahu u kthen përgjigje, duke ua hedhur poshtë si të pavërtetë këtë krahasim. Allahu sqaron se Ai e ka lejuar fitimin nëpërmjet tregtisë, sepse tek ajo ka dobi të përgjithshme dhe vetjake. Në anën tjetër, Zoti Fuqiplotë e ka ndaluar fitimin nëpërmjet kamatës, për shkak të padrejtësisë që ndodh aty, ku shfrytëzohet nevoja e tjetrit dhe merret pasuria e tij pa i dhënë asgjë në këmbim. Prandaj, kush mëson për këtë urdhër nga Zoti i botëve për ndalimin dhe rrezikshmërinë e kamatës dhe heq dorë prej saj i penduar për çfarë ka bërë, atij i falet ky gjynah dhe i lejohet t'i mbajë fitimet e kaluara. Sa i takon së ardhmes, çështja e tij mbetet tek Allahu. Kështu, nëse ai vazhdon të merret me kamatë edhe pasi ka mësuar për ndalimin e saj nga Allahu dhe i është sqaruar argumenti, atëherë ky njeri e meriton hyrjen në Zjarr dhe qëndrimin aty në përjetësi. Me termin "përjetësi" nënkuptohet ose dënimi i përjetshëm për ata që e quajnë të lejuar kamatën, ose qëndrimi shumë i gjatë, por i fundmë, në Xhehenem, sepse qëndrimi i pafundmë në Zjarr do të jetë vetëm për ata që vdesin si jobesimtarë, ndërsa pasuesit e Teuhidit nuk do të jenë të përjetshëm në të.